Posting maya bukai

Ukai reti baka landak mandangka baga, baka ular mantaika sima!

Kena ke 14 April 2007 tu tadi, aku enggau bala bukai ti sama begulai gawa di Miri bisi dianjung kompeni alai gawa belajar nambahka penemu ngagai menua Jepun. Kami seraban diberi peluang ti chukup beguna ba kami iya nya ngambi kus pasal Advanced Engineering' di menua Tokyo, Jepun.
Kami sebuat angkat ari Miri terebai ke Kuala Lumpur sebedau mupuk ngagai menua Jepun.

Hari siti, kena malam 14 April 2007 iya nya urung pukul 11 malam kami berangkat ari Kuala Lumpur International Aiport (KLIA) nuju Narita Aiport di Jepun din. Umbas iya ga asai, nyau puas ga nepan bilun tang ati semampai gagit laban ti deka nerengkahka diri ba menua ke jauh. Udah tentu utai ke din nya jauh nyelaie agi ari ti ba menua kitai enti nitihka suah dipeda sebelah suratkabar enggau TV.
Sepemanjai awak dalam bilun MAS ke penuh muat bala pasinjir nya, sesekali bisi ga ati aku irau lebuh bilun bisi berasai tekelidas ke kiba enggau ke kanan, nyangka benung neresa gumpal remang. Bisi enam jam udah nelusur remang meraka tasik, kira pukul 6 pagi siti iya nya 15 April 2007 bilun kami pan berengkah nensamka luan. Nya baru aku nemu kami nyau deka nyangkaika diri di padang bilun Narita. Nyau kelama udah nensamka luan, aku pan nilik ke baruh lalu sempat ninjau rampa mengeri Narita ke penuh enggau kampung! Ukai kampung kayu, tang bekampung ke rumah ke tinggi-tinggi, bekebelik engau cheremin rumah. Makin bilun baruh, makin berupai ga dipeda gaya menua orang.

Musin orang menua Jepun maya nya nyau ka ujung musin 'Spring' lalu gaya hari balat bendar ngasuh isi gegetak laban penyelap nya bisi entara 6 ngagai 8 degress selsius, iya nya nyau deka datai ikas ai meku. Nasit ga kami seraban endang besediaka baju ke tebal. Amat ga suah begiga sebelah kampung jerung, beselam ke ikan di menua kitai ditu, tang enti nyau 6 degrees selsius, enda mih tan. Enggai ga bula nusoi.

Datai ba Narita Airport, kami lalu ngelawa Kastam enggau sekuriti aiport. Atur sereta jaga pengelikun ba padang bilun Narita chukup terit. Kengka kantung ke dibai bala kami endang diperunsaika ambis lengis, ambis ditilik digama. Taja pan baka nya, orang ke nyaga pengelikun dia gawa enggau penuh basa kelebih agi enti sida iya nemu kitai datai ari menua luar Jepun.
Pengudah pasport enggau barang kami diperesa bala immigration enggau bala Kastam sereta sekuriti, kami sebuat lalu mupuk ngelawa endur bas ke enda tentu jauh ari nya empu. Ari padang bilun Narata kami nepan bas nuju Yokohama City Terminal. Dalam pejalai ngena bas nya, tak asai ke sakai bendar tudah diri berati ke rampa menua Narita. Malik ke kiba ke kanan, tusah deka meda uras sebelah nisi jalai. Nya mih ku ati aku din, enti kitai ditu, tak sepeneka bebuaika uras. Nyadi enggi orang menua nyin, sida enggai muai uras ukai ketegal ti takut ditangkap poilis, tang perangai ke baka nya endang udah chukup engkeman ba ati tiap iku rayat. Pengudah dua jam nepan bas, kami pan datai di Yokohama City Terminal. Pansut ari bas kami lalu ngena teksi nuju apartment ti udah diungkupka ngagai kami iya nya di Breeze Bay ba Yokohama.

Kena 16 April 2007 tumu pagi aku enggau bala bukai bela nyikap diri enggau naka ulih laban pagi nya kami sebuat deka nurun trining. Udah tembu bebela enggau ngemas diri kami pan nuju stesyen keretapi laju. Enda lama nganti, kami lalu nepan 'High Speed Train' ari Yokohama nuju menua Shimbashi, Tokyo ti endur kami belajar. Apu, pama ga asai pengelaju keretapi nya sepi aku. Berasai amat laju, nambahka nya keretapi chukup beresi lalu bisi 'class'. Jauh manah ari keretapi, LRT tauka lokomotif sebelah Kuala Lumpur nya. Ari keretapi nya mega aku semampai meratika rampa menua ke dipansa. Sesekali bisi ga nguji deka ngelala bansa kayu enggau rumput nebing jalai, tak nadai ga meda sida anak kemunting, lemba, senggang enggau panyun. Bisi ga nyau deka sebaka enggau lengki, tang nyau dipeda semak ukai ga nya lengki. Nyangka nya bansa utai tumbuh ti nyadi pengias di menua orang din. Nyampau iya ga penyauh menua ti dilawa endur trining, pengelama nepan keretapi laju kurang lebih sejam ari Yokohama City.
Lebuh ti berandau ruai enggau pengajar (lecturer) kami iya nya Mr. Fumiko Tanaka, iya madahka penyampau mensia ti nguan mengeri Tokyo aja nya dianggarka enda kurang ari 11 juta iku mensia, iya nya nyau deka separuh ari rayat Malaysia ditu. Taja pia, aku endang udah dulu nemu laban sebedau tu aku suah meresa ba internet pasal menua Narita di Jepun.
Pengelama kami ti bejalarka penemu ''Advanced Engineering' ba menua nya lima hari berungu. Lima hari nya umbas amat sepi aku ngansah untak nyau tuai tu. Umbas iya ga penanggul disepi sereta diasai lebuh maya trining nya tang laban ati ti sigi meruan deka ngulihka penemu, semua penanggul ulih diseliahka magang. Penanggul nya kelebih agi diasaika maya ti diasuh ngaga peresa ti dikena bala pengajar nentuka kami amat udah meretika utai ti diajar ngagai kami sepemanjai lima hari nya. Nasit bendar ga aku enda tekait ba peresa nya.

Pengujung trining iya nya maya lemai hari lima kena ke 20 April 2007, dia kami bisi dibai bala pengajar enggau pengurus kami di menua Jepun raun nemuai ngagai 'Land Tower' iya nya rumah ti pemadu tinggi ba menua Narita. Peninggi rumah nya bisi 69 tingkat. Siti utai ti ngasuh aku temegah amat ati iya nya lebuh ke dibai niki rumah nya ngena lif. Ukai enda kala nepan lif, tang lif ke dikena kami nya iya nya lif ke pemadu laju ba dunya…!!! Kitai endang nemu, menua Jepun semampai nengkebang teknologi ti baru, nya alai enda iran kitai enti nemu menua Jepun nya siti ari menua ke patut dipebasaka ari segi teknologi enggau sains. Nyadi pengelaju lif ke ditepan kami dikena niki 'Land Tower' nya bisi lebih kurang 750 meter seminit. Amat pan agi kelia puas ke berayun sebelah randau baka Tarzan, tang ke sekali nya lain endar asai. Deka nyerauh dalam lif, enggai ke dikumbai orang sakai amat ga! Tak tekeleput asai burit, asai ke labuh atau!

Kena pagi 21 April 2007 iya nya hari siti, aku enggau bala bukai bisi nemuai meri tabi basa ngagai 'Emperor of Japan' iya nya Raja menua Jepun. Pengudah meri tabi basa ngagai Raja, kami lalu neruska pejalai nuju kaki bukit Fuji, bukit ke tebilang lalu pengabis tinggi ba menua Jepun, iya nya 3776 meter. Rampa menua ba endur bukit Fuji nya udu pemanah, lalu tuchung bukit Fuji nya dipeda semampai burak laban ti dibungkur seleju sepemanjai taun. Nyadi ba kandang kaki bukit nya mih alai orang numbuhka ladang buah epal ti besai lalu ba menua kitai Malaysia, epal ari ladang nya dikanggauka kitai epal Fuji laban ti ngambi nama bukit nya empu.
Kelimpah ari ti dibai ngagai bukit Fuji nya mega aku enggau bala bukai bisi nemuai ngagai 'duty free city di Akiharabara' iya nya siti mengeri alai orang menua nya bejualka barang ti nadai chukai import (duty free), di Tokyo ti endur orang nyual macham-macham perengka elektronik.
Nyau enda berasai aku diau di menua Jepun, hari kami pan nyau suntuk alai mulaika diri ke menua. Agi belala asai ati begulai, besulu enggau orang din. Ka pan enda kitai ga sigi anak temuai datai nemuai enda lama, pama nemuai mesti mih pulai. Enti nitihka asai ati din sigi deka enggau orang berimba ngaga temuda, deka ngaga tegalan alai bumai mih ba menua nya, tang dini nya ulih ditunda. Pandak munyi jaku, enti nyema baka jam ulih surut pulai ke pun baru, nyamai mega kitai berunding nguing ngiga utai ke patut nitihka asai ati.
Nitihka perati kami sekaban, rega barang enggau perengka bukai ti kena ngidupka diri di menua nya jauh tinggi rega ari menua kitai. Ambika banding, rega minyak petrol (minyak kerita) nya 130 Yen seliter, baka nya mega minyak diesel dijual 100 Yen seliter. Ai Bia berega 27 Yen sebutol (100 Yen duit Jepun sama enggau RM2.80 duit kitai). Barang bukai mega endang jauh tinggi rega ari ba menua tu. Nya alai ba penemu sekeda orang, pendiau pengidup orang di menua Jepun nyelai mimit laban kitai jarang meda sida nurun kereja ngena kerita diri empu tang nyau deka semua orang ti mindah gawa nurun ngena keretapi tauka train magang pulai mansang. Tu mega tanda mensia menua nya angkunka pendiau pengidup bekenaka pengangkut ti disediaka perintah menua dikena ngurangka pengisuk jalai raya, lalu mega dikena ngurangka asap kerita ti tau ngamahka angin ba menua nya.

Siti agi, enti kitai teingatka jerita ti ditampung ari sida ke tuai maya Jepun merintah menua kitai kelia, dia kitai ngerunding penyai orang Jepun. Runding ke baka nya jauh bendar salah ari pekara ke amat laban orang menua Jepun ngembuan basa ti tinggi enggau orang sekalika nya sida bela sida tauka enggau temuai. Dini-dini kitai meda, sida idup bebasa. Ukai semina nya, tang sida mega bisi disiplin ke besai. Ambika banding, agu ke disediaka sebelah nisi jalai nya endang semampai beresi baka ke ba hotel lima bintang. Tusah deka meda uras bisi sebelah nisi jalai. Nya mih tanda mensia ke nguan menua nya udah maju, ukai semina maju runding, tang maju teknologi. Semengat ke baka nya mih ke patut ditanam ba runding tiap iku kitai ditu.
Amai pan ati agi belala diau di menua orang tang kami tetap mulaika diri. Kena ke 22 April 2007 kami angkat terebai ari menua Jepun. Kami sebuat berasai gaga bendar ati laban ulih nembuka trining lalu mega ulih meda menua orang. Taja pia, penyinu ati ngagai bala pangan ti ditinggalka di menua orang sigi enda ulih kira, semina ke enda beserara enggau ai mata aja mih enggau pangan diri. Bisi mimpi ke manah engka ulih ga nemuai kin baru.